Nes jörðin var talin 16 hundruð samkvæmt fornu mati. Þá er átt við það sem núna eru kallaðar Nes- og Naustajarðir. Snemma á 20. öld var Nesjörðinni skipt í tvo hluta, Nes I, sem núna er oftast kölluð Naust og Nes II sem núna gengur venjulega undir heitinu Nes.
Ekki eru stór tún eða slægjur á jörðinni en verðmætið var aðallega talið felast í fjörubeit sem er mjög góð. Kindurnar þrífast ágætlega á sölvum og fleiru sem þær finna í fjörunni.
Jarðirnar ná frá botni Grunnavíkur sunnan megin þar sem áin Kumlá rennur, alveg út í fossinn Míganda sem er í Bjarnarnúpnum. Strandlengja jarðanna er um 7 kílómetrar. Þar af eru 3-4 kílómetrar undir þverhníptum Bjarnarnúpnum þar sem hætta stafar að grjóthruni.
Láglendi jarðanna samtals er um 3,0 ferkílómetrar sem þýðir að hvor jörð um sig er nálægt 150 hekturum.
Hvað varðar nýtingarrétt á slægjum og eldiviðarafnot er jörðunum skipt í sjö skika þar sem skiptast á skikar frá Nesi og Nausti. Skikarnir ná frá fjörukambi til fjalls. Haustið 2006 gengu Sigfús Kristjánsson og Finnur Hrafn Jónsson um alla jörðina og mældu GPS hnit á landamerkjahælum sem afmarka skil jarðapartanna.
Gróðurfar á jörðinni er hefðbundnir íslenskir móar með djúpu grasi næst bænum.